قطار قنا

قطار قنا

من داخل القطار حوار بين راجل وست في الخمسينات تقريبا..من الناس البسيطه كان صوتهم عالي شويه..
هي:ما انت يا راجل لازم تهتم بنفسك شويه هاتلك غيارين داخلي ..هدومك كلها دابت.
هو:مش مهم ابقي خيطيهم اي حاجه ..العيال اهم ..فكرتيني عايزين نجيب كوتشي لمحمود (واضح انه ابنه)..الكوتشي بتاعه باظ…ومني عايزه 5 جنيه للمدرسه قال هيزينوا الفصل هي ناقصه.
هي:هنجيب من فين فلوس…اقولك انت معاك كام؟
هو:20 جنيه..بس مش معايا غيرها..يمكن تفرج بكره بصرحه ولا يوميه اهي تمشي شويه لحسن الدنيا بقت واقفه.

هي:اقولك نروح نجيبها قسط من الدكان اللي جنبنا..نديله عشره ونقسط الباقي كل شهر 5 والبنت تاخد 5 جنيه بتاعتها وانا مدكنه 10 جنيه تمن البيض اللي ببيعه كده كويس.
هو:كده كويس..نسينا من نجيب بتنجان نقليه..علشان العشا.
هي :مفيش زيت اصلا..مش مهم شويه فول والعيال تشبع وتنعس..
واستمروا في سرد حياتهم اليوميه وفي اول محطه قاموا علشان ينزلوا ..قلت اسعدهم بس خفت احرجهم..عملت ذكي..ندهت يا حاج الفلوس دي وقعت منك..قلي لا يا باشا دي مش فلوسي شوف صاحبها مين قولتله انا شايفها وقعت منك..رد بكل ادب وبساطه..مش بتاعتي..السلام عليكم…قلتله طيب خدها ولو حد سال عليها ابقي ادهياله انا..قلي انا فاهم..ربنا يبارك فيك..مش بمد ايدي لاي حد..عايز تساعدني ادعيلي ربنا يسترنا ونعدي منها خير..سكت قولتله ربنا يعدينا منها كلنا ع خير..نزل وتكومت ع اقرب كرسي..رجل طحنته الدنيا وبقي شامخا يحارب كي يعيش…كم انت عظيم بل اعظم من كثير لا يملكون كرامتك وتعففك…حق كل هؤلاء في رقاب من يملك ولا يتزكي..حقهم في رقاب كل مفسد وظالم..لنا ولهم الله.

عن محمد ابو ادهم

محمد بكري ،اسم الشهرة (ابوادهم) ،مواليد 1/9/1993 ،مهندس مدني ،الاقامة:جمهورية مصر العربية

شاهد أيضاً

أحمد المفتاح ضمن لجنة تحكيم مهرجان الدن العربي

الدوحة – الشرق اختير الفنان أحمد المفتاح ضمن لجنة التحكيم لعروض مسرح الكبار في مهرجان …

اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.